*** بسم الله بديت وعلى النبي صليت عيطت يا خالقي يا مولاي كملي فيى البوقالات واش نويت .***
1-يا الحمام الطاير نعطيك تديلي لجواب و جيبلي خبر لحباب قلبي راه حاير وقتاش يولي اللى غاب.
2-علاش يا لالة التخمام رحمة الله واسعة وكبيرة لو كان جات بالكلام نتحدتوا و نعطوك تدبيرة بصح كل شيئ بالمكتوب و يعيا الخبر يبان و تزول عليك الحيرة.
3-رديت الباب دفة علي دفة وطويت الفراش لفة على لفة أنا سعدي شمعة صعيب تنطفي.
4- زاز علي باب دارنا يفصل بالعكري قتلوا فصلي قدي قالي نفصلك قاط او نزيدلك من عندي .
5-عندي مخدة خوخية ما يوسده غير اللى عزيز عليا.
6-مشيت الدرو الدرو لقيت الدرو يابس قتلوا يا درو كلملي الرايس قالي الرايس راه راقد رقاد الملوك ومعنق الطاوس.
7-حب الملوك في وراقوا وأنا الحبيب قلبي مشتاقوا.
8-ادا حبك القمر بكمالوا واش عندك فالنجوم ادا مالوا .
9-غالي غالي والغالي ربي مهمى تروح و تغيب معزتك ديما في قلبي.
10-سلمت سلامي للزينة في وراق التشينة قلت لها ما زالك فالقلب ديما.
11-أنا شابة او مهري غالي واللى باغي يديني يحسب النجوم و يسهر الليالي و يبنيلى القصور فالعلالي.
12-ربي يا ربي يا خالق كل ارباب يالى خلقت العنب وثنيت بالعناب يا ربي اجمع بين فرقة الأحباب.
13-عينيك توت وحواجبك ياقوت أنا نديك و اللى حب يموت يموت .
14-حنة يا حنة يا معطرة بروايح الجنة يا اللي جا داكرك فالسيرة والسنة اللى يخبل بيك يدوا يتهني .
15-فاطمة يا كحلة العيون وين دلوني نرسلك مرسول أدا سكنت البحر نرسلك عوامة وادا فالسما نرسلك حمامة أنت شابة ما نديك غير أنا .
16-خرجت فيالليل نطلب فالله صبت النجوم دايرة برسول الله كل وحدة تقول غالب الله واحد ما يدي غير واش اعطاه الله.
17-حبكت للبحر صبت الرمل يغلي لميتو بيدي وحطيتو في حجري نطق ليا الملك و قالي يفرج ربي يجيك سالم بجاه النبي العربي .
18-يوم الخميس يا ناس سافرو فيه الحجاج انهزوا فيه رياح البحر و تقابلو الأمواج يا أهلي ويا جيراني نزور قبر النبي حجة وبركاني .
19-رونت الحنة بالزهر والمسك و العنبر ومديت كفي للقمر وخرجت للبر ندور تسقم سعدي اللي كان تحت البحور.
20_يا جاية من عند العين و بيدك مليتي القلة سبحان من أعطاك الزين وزادت في بهاك الحنة.
تحياتي لكم